ސާފް ޗެމްޕިއަންޝިޕުގެ ހަތަރުވަނަ މެޗުގައި މިރޭ ބައްދަލު ކުރާނީ ފުރަތަމަ މެޗުގައި ބަންގްލަދޭޝް ޓީމު އަތުން ބަލިވި ސްރީލަންކާއާއި ރާއްޖެ އަތުން މޮޅުވި ނޭޕާލްއެވެ.
މިފަހަރުގެ މުބާރާތުގައި އެންމެ ވަރުގަދަކޮށް އޮތް އެއް ޓީމަކީ ނޭޕާލްއެވެ. މުބާރާތުގެ ކުރިން ރަނގަޅު ފަރިތަކުރުންތަކަކާ އެކު އެ ޓީމުން ވަނީ ވަރުގަދަ މެޗުތަކެއް ވެސް ކުޅެފައެވެ. އެގޮތުން އިންޑިއާގެ ޓީމާ ދެކޮޅަށް ދެ މެޗެެއް ކުޅެފައިވާ އިރު، އެ ޓީމުން ވަނީ އެ ދެ މެޗުގައި ވެސް ރަނގަޅު ކުޅުމެއް ދައްކައިފައެވެ. މިއީ އެ ޓީމަށް ފުރަތަމަ ސާފް ޗެމްޕިއަންޝިޕް ހޯދުމަށް ރަނގަޅު ފުރުސަތެކެވެ.
މި މުބާރާތާއި ނޭޕާލް ކުރިމަތިލީ ފުރަތަމަ ފަހަރަށް މި މުބާރާތުގެ ތާރީހުގައި ޗެމްޕިއަންކަން ހޯދުމުގެ އަޒުމުގައެވެ. އެންމެ ދުރަށްވެސް އެ ޓީމަށް ދެވުނީ މުބާރާތުގެ ސެމީފައިނަލާއި ހަމަޔަށެވެ. އެގޮތުން 1995 ގައި އަމިއްލަ ގައުމުގައި ބޭއްވި މުބާރާތާއި 199 އަދި 2011 އާއި 2013 ގެ މުބާރާތުންވެސް އެ ޓީމު ވަނީ ސެމީފައިނަލާއި ހަމަޔަށް ދަތުރުކޮށްފަައެވެ.
ނޭޕާލާއި ސްރީލަންކާ ވަނީ މިހާތަނަށް 17 ފަހަރެއްގެ މަތިން ބައްދަލުކޮށްފައެވެ. އެންމެ ފުރަތަމަ މި ދެ ޓީމު ބައްދަލުކޮށްފައިވަނީ 1984 ވަނަ އަހަރު އެކުވެރިކަމުގެ މެޗެއްގައެވެ. އެ މެޗު ސްރީލަންކާ ކާމިޔާބުކޮށްފައިވަނީ 4-0 ގެ ނަތީޖާއަކުންނެވެ. ސާފް ޗެމްޕިއަންޝިޕުގައި މި ދެ ޓީމު އެންމެ ފުރަތަމަ ބައްދަލުކުރީ 1993 ގައެވެ. އެ މެޗު ނިމުނީ ލަނޑެއް ނުޖެހި އެއްވަރުވެގެންނެވެ.