ލަންކާގެ ނެގަމްބޯ އާ ދިމާލުން ކަނޑުގެ ސަރަހައްދުގައި ނުރައްކާތެރި ކެމިކަލްތަކަކާއެކު ދަތުރުކުރަމުންދަނިކޮށް، މިދިޔަ މަހު އެމްވީ އެކްސްޕްރެސް ޕިއާލްގައި އަލިފާން ރޯވުމުގެ ސަބަބުން އެ ސަރަހައްދުގެ ކަނޑުގެ ދިރުންތަކުގެ ތެރެއިން 417 ވެލާ މަރުވެފައިވާކަމަށް އެ ގައުމުން ބުނެފިއެވެ.
އެ ބޯޓުގައި ރޯވެ އެތައް ކެމިކަލެއް ކަނޑަށް އެޅިފައިވާއިރު އޭގެ ސަަބުބުން އެ ސަރަހައްދުގެ ބީޗުތައްވެސް ވަނީ ކެމިކަލުން ތަޣައްޔަރުވެފައެވެ.
އަދި ގިނަ އަދަދެއްގެ މަސްމަހާއި ކަނޑުގެ ދިރުންތައް މަރުވެ އެއްގަމަށް ވެސް ވަނީ ލައްގާފައެވެ.
އެގޮތުން މިހާތަނަށް 417 ވެލާ މަރުވެ 48 ކޯ މަހުގެ އިތުރުން އަށް ބޮޑުމަސްވަނީ މަރުވެފައެވެ.
މިއީ މިހާތަނަށް ލަންކާ އަށް ކުރިމަތިލާން ޖެހުނު ތިމާވެށީގެ އެންމެ ބޮޑު ކާރިސާއެވެ.
އެ ބޯޓު ދަތުރުކުރަމުން ދިޔައީ 25 މެޓްރިކް ޓަނުގެ ނައިޓްރިކް އެސިޑާއެކުއެވެ. ހަމައެއާއެކު އެތައް ޓަނެއްގެ ކުދި ކުދި ޕްލާސްޓިކް ޕެލެޓުވެސް އެ ސަރަހައްދުގެ ބީޗަށްވަނީ ލައްގާފައެވެ.