ޕްރައިވަޓައިޒޭޝަން އެންޑް ކޯޕަރޭޝަން ބޮޑުގެ ރައީސް މުހައްމަދު ނިޒާރު އެ މަގާމުން އިސްތިއުފާ ދެއްވައިފިއެވެ.
ކުރީގެ ރައީސް އަބްދުﷲ ޔާމީންގެ ސަރުކާރުގައި ޕީބީސީ ބޯޑަށް އައްޔަނު ކުރެއްވި ނިޒާރު މަގާމުން އިސްތިއުފާ ދެއްވިކަން އިއުލާނު ކުރެއްވީ ޓްވިޓާގައެވެ.
ނިޒާރު ކުރެއްވި ޓްވީޓުގައި ވިދާޅުވީ ފަސް އަހަރާއި 26 ދުވަހަށްފަހު ޕްރައިވަޓައިޒޭޝަން ބޯޑުން އިސްތިއުފާ ދެއްވާފައިވާ ކަމަށެވެ. ގައުމީ ހިދުމަތުގައި 34 ހޭދަ ކުރެވިއްޖެ ކަމަށްވެސް ނިޒާރު ވިދާޅުވިއެވެ.
ނިޒާރު ވަނީ ދިވެހި ސަރުކާރަށާއި ޕްރައިވަޓައިޒޭޝަން ބޯޑަށް ޝުކުރު އަދާ ކުރައްވައިފައެވެ.
ނިޒާރު ޕްރައިވަޓައިޒޭޝަން ބޯޑުން އިސްތިއުފާ ދެއްވިއިރު އެ ބޯޑުގައި ތިއްބެވި މެންބަރުން ބަދަލު ކުރުމަށް މަޖިލީހުގެ ބައެއް މެންބަރުންނާއި ސަރުކާރަށް ތާއީދު ކުރާ އާންމުން ދަނީ ގޮވާލަމުންނެވެ.
ޕްރައިވަޓައިޒޭޝަން ބޯޑަކީ ޕްރައިވަޓައިޒޭޝަން އެންޑް ކޯޕަރޭޝަން ގާނޫނުގެ ދަށުން އުފައްދާފައިވާ ހަތް މެންބަރުންގެ މައްޗަށް އެކުލެވޭ ބޯޑެކެވެ.
ސަރުކާރު ހިއްސާވާ ކުންފުނިތަކުގެ މަސައްކަތްތައް މޮނީޓާކުރާ އެ ބޯޑަށް މެންބަރުން އައްޔަނު ކުރަނީ މަޖިލީހުގެ ރުހުމާއެކު ރައީސް އެވެ. ބޯޑުގެ ރައީސާއި ނައިބު ރައީސްވެސް މަޖިލީހުގެ ރުހުމާއެކު އައްޔަނު ކުރަނީ ރައީސުލްޖުމްހޫރިއްޔާއެވެ.