މާދަމާރޭ ކާނިވާ ސަރަހައްދުގައި ޖަލްސާއެއް ބާއްވަން އެ ސަރަހައްދު އިދިކޮޅު ޕީޕީއެމް-ޕީއެންސީ ކޯލިޝަނަށް ދޫކޮށްފި އެވެ.
މިދިޔަ މަހުގެ 27 ވަނަ ދުވަހު އެ ކޯލިޝަނުން ވަނީ ކާނިވާ ސަރަހައްދު ހޯދުމަށް ޕްލޭނިން މިނިސްޓްރީއަށް ސިޓީލާފައެވެ. އެ ސިޓީގައި އެދިފައި ވަނީ މާދަމާ ރޭ 18:00 އިން 00:00އަށް އެ ސަރަހައްދު ދޫކުރުމަށެވެ.
ޕީއެންސީގެ ތަރުޖަމާނު ހީނާ ވަލީދު މިއަދު ވިދާޅުވީ، ކާނިވާ ސަރަަހައްދުގައި ޖަލްސާ ބާއްވަން އިއްޔެ ހުއްދަ ލިބިފައިވާ ކަމަށެވެ.
މާދަމާރޭ ބާއްވާ ޖަލްސާގައި ކުރީގެ ރައީސް އަބްދުﷲ ޔާމީން ބައިވެރިވެވަޑައިގަންނަވާނެ ކަމަށް ޕީޕީއެމް-ޕީއެންސީ ކޯލިޝަނުން ވަނީ ބުނެފައެވެ.
މާދަމާ ރޭ ބާއްވާ ޖަލްސާ އަކީ މި ސަރުކާރު އައި ފަހުން އިދިކޮޅުން ރާވައިގެން ބާއްވާ ފުރަތަމަ މިފަދަ ޖަލްސާ އެވެ.