ގދ. ތިނަދޫ ކޯޓުގެ މެޖިސްޓްރޭޓް އިބްރާހިމް ރަޝީދު މެޖިސްޓްރޭޓް ކަމުގެ ވަކިކުރަން ރައްޔިތުންގެ މަޖިލީހުން ފާސްކޮށްފި އެވެ.
ދެހާސް ތޭރަ ވަނަ އަހަރު އިބްރާހިމް ރަޝީދުގެ މައްސަލަ ޖޭއެސްސީއަށް ހުށަހެޅި އޭނާ ވަނީ އެ އަހަރުގެ މެއި މަހުގެ ތެރޭގައި ސަސްޕެންޑުކޮށްފަ އެވެ. އެފަހުން ހަ އަހަރު ފާއިތުވެފައިވާއިރު އޭނާގެ މައްސަލަ ބަލައި، އޭނާ މަގާމުން ވަކި ކުރަން ޖޭއެސްސީ އިން މަޖިލީހަށް ފޮނުވީ މި ހަފްތާގަ އެވެ.
މިއަދު މަޖިލީހުގައި ނެގި ވޯޓުގައި ބައިވެރިވި މަމެއްބަރުންގެ ތެރެއިން 70 މެމްބަރުން ވޯޓު ދީފައި ވަނީ އިބްރާހިމް ރަޝީދު ވަކިކުރާށެވެ. މިއީ މަޖިލީހުން ފަނޑިޔާރަކު ވަކިކުރި ފުރަތަމަ ފަހަރެވެ.
އިއްޔެ ރައްޔިތުންގެ މަޖިލީހުގެ ޖަލްސާގައި ވަނީ އިބްރާހިމްގެ މައްސަލާގައި ޖޭއެސްސީގެ ރިޕޯޓު އިއްވައިފަ އެވެ. އެ މައްސަލާގައި ބުނެފައި ވަނީ އެ މައްސަލައަކީ ގާޒީ އިބްރާހިމް އާންމު ތަނެއްގައި އަންހެނަކާ ޒުވާބުކޮށް ހަޑި ހުތުރުބަހުން ވާހަކަ ދެއްކުމުން މުހައްމަދު ލަތީފު ނަމަކަށް ކިޔާ އާންމު މީހަކު ހުށަހެޅި މައްސަލައެއް ކަމަށެވެ.
އެގޮތުން، އިބްރާހިމް، އާންމު ތަނެއްގައި ތިނަދޫގެ އަންހެނަކާ ދިމާލަށް ހަޑި ހުތުރު ބަހުން ހަޅޭއްލަވައި އަޑުގަދަކޮށް އެ އަންހެން މީހާ އަކީ ނަހަލާލަށް ބަލިވެ އިނދެ ދަރިވައްޓާފައި ހުރި މީހެއް ކަމަށް ބުނެފައިވާ ކަމަށް ރިޕޯޓުގައިވެ އެވެ.
ރިޕޯޓުގައި ވަނީ ފަނޑިޔާރުންގެ ސުލޫކު ހުންނަންވާ ގޮތް ފާހަގަކޮށްފަ އެވެ. އެގޮތުން ފަނޑިޔާރުންގެ އަހުލާގީ މިންގަނޑު ހުންނަވާނެ ގޮތް ރިޕޯޓުގައި ވެސް ފާހަގަކޮށްފައިވެ އެވެ. އަދި، އާންމު ތަނެއްގައި އަންހެނަކާ ޒުވާބުކޮށް ހަޑި ހުތުރު ބަހުން ވާހަަކަ ދެއްކުމަކީ ސުލޫކީ މިންގަނޑާ ހިލާފު ކަމެއް ކަމުގައި ބެލެވިދާނެ ކަމަށް ރިޕޯޓުގައިވެ އެވެ.
މިއީ ސުލޫކީ މައްސަލައަކާ ގުޅިގެން ފަނޑިޔާރަކު ވަކިކުރަން މަޖިލީހަށް ހުށަހެޅި ފުރަތަމަ ފަހަރެވެ. ފަނޑިޔާރަކު ވަކި ކުރެވޭނީ، މަޖިލިހުގެ ޖަލްސާގައި ބައިވެރިވާ މެމްބަރުންގެ ތެރެއިން ތިން ބައި ކުޅަ ދެ ބައި މެމްބަރުންގެ ވޯޓު ލިބިގެންނެވެ.
ދެހާސް ތޭރަ ވަނަ އަހަރުގެ ތެރޭގައި މަސްތުވާތަކެއްޗާ އެކު އިބްރާހިމް ހައްޔަރު ވެސް ކުރި އެވެ. އޭނާ ދޫކޮށްލާފައި ހުރީ ހައިކޯޓުގެ އަމުރެއްގެ ދަށުންނެވެ.