ކުރިއަށް އޮތް މަޖިލީސް އިންތިހާބުގައި އެމްޑީޕީގެ ޓިކެޓްގައި ގަމު ދާއިރާއަށް ވާދަކުރައްވާ މުހައްމަދު ވިސާމް (ސަމްޕަތު) އަދި ލ. ފޮނަދޫ ދާއިރާއަށް ވާދަކުރައްވާ ގާނޫނީ ވަކީލް މޫސާ ސިރާޖުގެ ކެމްޕެއިންގައި ނާއިބު ރައީސް ފައިސަލް ނަސީމް ބައިވެރިވެޑައިގެންފިއެވެ.
ސަމްޕަތާއި ސިރާޖުގެ ކެމްޕެއިންގެ ތެރެއިން މިއަދު ބޭއްވި ވެހިކަލް ބުރެއްގެ ހަރަކާތުގައި ފައިސަލް ވަނީ ފެނިވަޑައިގެންފައެވެ.
ފައިސަލް ގަމަށް ވަޑައިގަތުމާއެކު އެމްޑީޕީގެ ސަޕޯޓަރުންނާއި ސަމްޕަތުގެ ޓީމުން އޭނާ އަށް ވަނީ ހޫނު މަރުހަބާއެއްވެސް ކިޔައިފައެވެ. އަދި ސިރާޖުގެ ކެމްޕެއިން ހަަރަކާތްތަކުގައިވެސް ފައިސަލް ވަނީ ފެނިގެންގޮސްފައެވެ.
ފައިސަލް އެމްޑީޕީގެ ގަމު އަދި ފޮނަދޫ ދާއިރާގެ ކެންޑިޑޭޓުންގެ ކެމްޕެއިން ހަރަކާތުގައި ބައިވެރިވެފައިވާއިރު އެ ދެ ދާއިރާއަށް، ފައިސަލް ނިސްބަތްވެ ވަޑައިގަންނަވާ ޖުމްހޫރީ ޕާޓީންވެސް ކެންޑިޑޭޓުން ވާދަ ކުރައްވަ އެވެ.
ފައިސަލް ނާއިބު ރައީސް ކަމަށް އިސްކޮށްފައިވާ ޖުމްހޫރީ ޕާޓީގެ ޓިކެޓެއްގައެވެ. މީގެ ކުރިން ނާއިބު ރައީސް އެމްޑީޕީން މަޖިލިސް އިންތިހާބާ ދިމާކޮށް ކުރިއަށް ގެންދާ ކެމްޕޭންތަކުގައި ފެނިވަޑައިގެންފައެއް ނުވެއެވެ.
Raeesul Jumhooriyyaage naibu Hon. Faisal Naseem ah Iskandharu Vaige Marukazun hoonu maruhaba eh dhannavaifi.
— Wisam 2019 #ThilafathahMajilis (@Wisam2019) March 15, 2019
Mifaharu Gamu dhaairaage member akah Candidate No.3 Mohamed Wisam.#Wisam2019 #Agenda19 #Majilis19Thilafathah #VoteMDP pic.twitter.com/iRXOV2vr9C
ނާއިބު ރައީސް އެމްޑީޕީގެ ކެމްޕޭއެއްގެ ތެރެއިން ފެނިގެން ދިޔައިރު، ޖުމްހޫރީ ޕާޓީގެ ރައީސް އަދި ޓޫރިޒަމް މިނިސްޓަރު އަލީ ވަހީދުވެސް ވަނީ އެމްޑީޕީން ރޭ އެމްޑީޕީން ބޭއްވި ކެމްޕޭން ހަރަކާތެއްގައި، ޖޭޕީގެ ލީޑަރު ގާސިމް އިބްރާހިމްއަށް ވަރަށް ބޮޑަށް ފާޑުވިދާޅުވެސްވެފައެވެ.
ހުޅުމާލެ ދާއިރާއަށް އެމްޑީޕީ ޓިކެޓުގައި ވާދަކުރާ އެޕާޓީގެ ޑެޕިއުޓީ ޗެއާ އަލީ ނިޔާޒުގެ ކެމްޕޭން ޖަލްސާގައި، އެ ޕާޓީގެ ކުރީގެ ޗެއާޕާސަން އަލީ ވަހީދު ވިދާޅުވީ ކުރީގެ ރައީސް އަބްދުﷲ ޔާމީނުގެ ސަރުކާރު ބަދަލުކުރުމަށް އޭރުގެ އިދިކޮޅު ކޯލިޝަނުގެ ބައިވެރިން ކުރި އިހުލާސްތެރި މަސައްކަތްތައް ޖުމްހޫރީ ޕާޓީގެ ލީޑަރު ގާސިމް އިބްރާހީމަށް ގަބޫލުނުކުރެވޭނަމަ އެ ޕާޓީގައި ހުންނަން ބޭނުންފުޅު ނުވާކަމަށެވެ.
އަދި ގާސިމް އޭނާއަށް އިތުބާރު ނުކުރައްވާނަމަވެސް ޕާޓީގައި ހުންނަން ބޭނުން ނުވަކަމަށް ޓޫރިޒަމް މިނިސްޓަރު ވިދާޅުވިއެވެ. އަދި ރައީސް ސޯލިހާއި އެމަނިކުފާނުގެ ސަރުކާރުގެ އިތުބާރުވެސް އޭނާއަށް ނެތްނަމަ މިނިސްޓަރުގެ މަގާމުގައި ނުހުންނަވާނެކަމަށް ވިދާޅުވިއެވެ.
އޭގެ އިތުރުން ގާސިމްގެ އަންހެނުން އަދި ޓްރާންސްޕޯޓް މިނިސްޓަރު އައިޝަތު ނަހުލާވެސް ވަނީ ޕީޕީއެމް އަދި ޕީއެންސީގެ ކެންޑިޑޭޓުންނަށް ތާއީދު ނުކުރައްވާނެކަމަށް ވިދާޅުވެފައެވެ.