ރާއްޖޭގައި ފަތުރުވެރިންނަށް ހިދުމަތްދޭ ރިސޯޓުތަކާއި ގެސްޓްހައުސްތަކާއި ސަފާރީތަކުގައި ކަންކަން ހިނގާގޮތާއި ސަލާމަތީ ކަންކަން ބަލައި ކަށަވަރުކުރުމަށް ހިންގާ ބޮޑު އިންސްޕެކްޝަން ފަށައިފިއެވެ.
ޓޫރިޒަމް މިނިސްޓްރީން މީގެ ކުރިންވެސް ހާމަކޮށްފައިވާ ގޮތުން، މި އިންސްޕެކްޝަން ފަށާފައިވަނީ ރާއްޖޭގެ އެންމެ އުތުރުންނެވެ.
ޓޫރިޒަމް މިނިސްޓްރީން ބުނެފައިވާ ގޮތުގައި އިއްޔެއިން ފެށިގެން މާދަމާގެ ނިޔަލަށް ހއ. އަތޮޅާއި ހދ. އަތޮޅުގައި މި އިންސްޕެކްޝަން ކުރިއަށް ދާނެއެވެ.
ތިލަދުންމަތީގައި ހިންގަމުން އަންނަނީ ތިން ރިސޯޓެކެވެ. އެއީ ރާއްޖޭގެ އެންމެ އުތުރަށް އޮންނަ އިހަވަންދިއްޕޮޅު އަތޮޅުގައި އޮންނަ ހަމައެކަނި ރިސޯޓު ކަމުގައިވާ ހއ. މަނަފަރުގައި ހިންގާ ޖޭއޭ މަނަފަރު ރިސޯޓާއި، ބޮޑުތިލަތުންމަތީގައި އޮންނަ ހއ. ދޮނަކުޅީގައި ޔޮޓު މެރީނާއަކާއެކު ހިންގާ ހައިޑަވޭ ބީޗް ރިސޯޓް އެންޑް ސްޕާގެ އިތުރުން ހދ. ހޮނޑާފުށީގައި ހިންގާ ހޮނޑާފުށި އައިލެންޑް ރިސޯޓެވެ.
Tourist establishments Safety and Security Audit-Islands inspected in Haa Alif Atoll are Dhiddhoo, Dhonakulhi, Vashafaru, Kelaa, Hoarafushi and Manafaru. A total of 11 Guest houses 1 resort and 1 resort with marina will be inspected. pic.twitter.com/R9YipKpCQm
— Ministry of Tourism (@TourismMv) February 9, 2019
މީގެ އިތުރުން ހދ. ހަނިމާދޫގައި "ދަ ބެއާފުޓް އީކޯ ހޮޓެލް"ގެ ނަމުގައި ސިޓީ ހޮޓަލެއްވެސް ހިންގައެވެ.
ޓޫރިޒަމް މިނިސްޓްރީން ބުނީ މި ހަތަރު ޕްރޮޕަޓީގެ އިތުރުން ހއ. އަތޮޅުގެ ދިއްދޫ، ވަށަފަރު، ކެލާ އަދި ހޯރަފުށީގައި ހިންގާ 11 ގެސްޓްހައުސަކާއި ހދ. އަތޮޅުގެ ހަނިމާދޫ، ކުޅުދުއްފުށި، ނޮޅިވަރަންފަރު، ވައިކަރަދޫ އަދި ނެއްލައިދޫގައި ހިންގާ 10 ގެސްޓްހައުސެއްގެ ސަލާމަތާއި ރައްކާތެރިކަމާ ގުޅޭ ކަންކަން އިންސްޕެކްޓުކުރާނެ ކަމަށެވެ.
Tourist establishments Safety and Security Audit- Islands inspected in Haa Dhaalu Atoll are Hanimaadhoo, Hondafushi, Kulhudhuffushi and Nolhivaranfaru, Vaikaradhoo & Nellaidhoo. A total of 10 guest houses and 1 resort and 1 tourist hotel will be inspected. pic.twitter.com/fdmpgYaydS
— Ministry of Tourism (@TourismMv) February 9, 2019
މި އިންސްޕެކްޝަން މިނިސްޓްރީން ކުރިއަށް ގެންދަނީ ފުލުހުންނާއި ސިފައިންގެ އިތުރުން މޯލްޑިވްސް އެސޯސިއޭޝަން އޮފް ޓޫރިޒަމް އިންޑަސްޓްރީ (މަޓީ) ގުޅިގެންނެވެ.
"އަޅުގަނޑުމެންގެ ބަލާނެ ކަންކަމުގެ ތެރޭގައި ހިމެނެނީ އަލިފާނުގެ ހާދިސާތަކުން ސަލާމަތްވާ އަޅާފައިވާ ފިޔަވަޅުތައް. ސަލާމަތާއި ރައްކާތެރިކަމަށް އެޅިފައިވާ ފިޔަވަޅުތައް. މުވައްޒަފުންގެ ހައްގުތައް އަޅުގަނޑުމެން ވަރަށް ފުރިހަމަ ގޮތެއްގައި ބެލުމަށް ވަނީ ހަމަޖެހިފައި،" ޓޫރިޒަމް މިނިސްޓަރު އަލީ ވަހީދު މީގެ ކުރިން ވިދާޅުވެފައިވެއެވެ.
"މީގެ ބޭނުމަކީ ރާއްޖޭގެ ތަންތަނުގެ ހާލަތު ރަނގަޅަށް ދެނެގަތުމާއި އަދި ޕޮޒިޓިވް އެޕްރޯޗެއްގައި މިކަންކަން ރަނގަޅު ކުރުން. މިއީކީ އެއްވެސް ގޮތަކަށް އެއްވެސް ބަޔަކު ފަލީހަތް ކުރުމަށް ނުވަތަ އެއްވެސް ބަޔަކާ ދޭތެރޭގައި ނުރަނގަޅު ގޮތަކަށް ކަންތައް ކުރާކަށް ސަރުކާރުން ކުރާ ކަމެއް ނޫން،" އޭނާ ވިދާޅުވިއެވެ.