މޮޑެލް އަދި ލަވަކިޔުންތެރިޔާ އީމާން ނިޒާމް (އީމް ނިޒާމް) މިއަދު އިންސްޓަގްރާމްގައި ކޮށްލި ޕޯސްޓަކުން އެންމެންގެ ސަމާލުކަން އަތުލައިގަތެވެ.
ގިނަ ބަޔަކު ޝޮކެއްގައި ތިބި އިރު އަނެއް ބަޔަކު ވަނީ އޭނާ ދެއްކި ހިއްވަރަށް ސާބަސްދީ އިންސްޓަގްރާމް ޕޯސްޓަށް މެސެޖުކޮށްފަ އެވެ.
"ފުރަތަމަ ޑަކްޓަރުން ހީކުރީ އީމް އަށް ކެންސަރުޖެހިފައި ހުރިކަމަށް. ނަމަވެސް ފަހުން އެނގުނު ކެންސަރު ނެތްކަން. އެކަމަކު ވޭތުވެ ދިޔަ ހަ މަހުގައި ގިނަ ސިއްހީ މައްސަލަތަކެއް ވަނީ ދިމާވެފައި،" އީމް އިންސްޓަގްރާމްގައި ކުރި ޕޯސްޓުގައި ބުނެފައިވެ އެވެ.
އީމް ބުނީ ވޭތިވެ ދިޔަ ހަ މަސް ދުވަހަކީ އޭނާއަށް ދަތި އުނދަގޫވި ދުވަސްތަކެއް ނަމަވެސް އެ ކަންތައްތަކާ ކެރިގެން ކުރިމަތިލި ކަމަށެވެ. އަދި ކޮންމެ ރެއަކު ރަހުމާން ސޫރަތް ކިޔަވައި ދުއާކުރި ކަމަށް ވެސް އީމްކުރި ޕޯސްޓުގައި ބުނެފައިވެ އެވެ.
"ދުއާ ކުރަން ޖެހޭނެ. ދުއާކޮށް ކިޔެވުމުގެ ސަބަބުން އަހަރެން މިވަގުތު ސަލާމަތުން މިހުރީ،"
އީމް ބުނީ ދިމާވި ކަންތައްތަކަށް ފަސްޖެހުމެއްނެތި ކުރިއަށް ދިޔަކަމަށެވެ. އަދި ކުރަން ޖެހޭ މަސައްކަތް ވެސް ކެތްތެރިކަމާ އެކު ގަވައިދުން ކުރާ ކަމަށެވެ.
"އެންމެ ހިތްވަރު ލިބުނީ އާއިލާގެ ފަރާތުން. ދެން ރަހުމަތްތެރިންގެ ފަރާތުން. އެމީހުންގެ ދުއާ މިއީ،"
އީމް އިންތިޒާމްކޮށްގެން ދާދިފަހުން މާލޭގައި ކުރިޔަށް ގެންދިޔަ "ހީނާ އާޓް މާސްޓާކްލާސް"ގެ ޗެރިޓީ އިވެންޓެއް މާލެ އަތޮޅު ގުރައިދޫގައި ވެސް ވަނީ ހިންގައިފަ އެވެ. އެ ކްލާސްތަކުގެ ބައިވެރިންނަށް ވަނީ ސެޓްފިކެޓްގެ އިތުރުން ތަފާތު ހަދިޔާތައް ވެސް ދީފަ އެވެ. ދާދި ފަހުން އީމް ވަނީ އަމިއްލަ ޕްރޮޑަކްޓެއް ކަމަށްވާ"ލެމަންގްރާސް ސޯޕް" އާއި "ބޯއީ ބާއި ލިޕް ސްކްރަބް" ވެސް ތައާރަފްކޮށްފަ އެވެ.