އިންޑިއާގެ ކުރީގެ ބޮޑުވަޒީރު އަތަލް ބިހާރީ ވަޖްޕާއީ އަވަހާރަވުމާ ގުޅިގެން އިންޑިއާގެ ރައީސް ރާމް ނާތް ކޯވިންދަށް ރައީސުލްޖުމްހޫރިއްޔާ ޢަބްދުﷲ ޔާމީން ޢަބްދުލްގައްޔޫމް ތަޢުޒިޔާ ވިދާޅުވެ މެސެޖެއް ފޮނުއްވައިފި އެވެ.
ރައީސްގެ ފޮނުއްވި ތަޢުޒިޔާގެ މެސެޖުގައި، އެ ޚަބަރު އެއްސެވީ ކުއްލި ހައިރާންކަމާއި ފުން ހިތާމައާ އެކު ކަމުގައި ވިދާޅުވެފައިވެ އެވެ.
އަދި އަތަލް ބިހާރީ ވަޖްޕާއީގެ ހަނދާންތައް އާކުރެވިގެން ދާނީ ހަމައެކަނި ގައުމަށް ހިދުމަތްކުރެއްވި ލީޑަރެއްގެ ގޮތުގައި ނޫން ކަމަށާއި އިލްމު އުގަންނައިދިނުމަށް އަގުހުރި މަސައްކަތްތަކެއް ކޮށްދެއްވާފައިވާ ބޭފުޅެއްގެ ގޮތުގައި ވެސް އެމަނިކުފާނުގެ ހަނދާންތައް ދެމިގެންދާނެ ކަމުގައި ރައީސް ޔާމީން ވިދާޅުވެފައިވެ އެވެ.
ރައީސްގެ މެސެޖުގައި ގައުމީ ހިތާމައިގެ މި ދަނޑިވަޅުގައި އިންޑިއާ ސަރުކާރަށާއި އެ ގައުމުގެ ރައްޔިތުންނަށް ވަރަށް އިޚްލާޞްތެރިކަމާ އެކު ހަމްދަރުދީ ފޮނުއްވާފައިވެ އެވެ.
އޭގެ އިތުރުން އިންޑިއާގެ ކުރީގެ ބޮޑުވަޒީރު އަތަލް ބިހާރީ ވަޖްޕާއީގެ އާއިލާއަށް ތަޢުޒިޔާ ރައްދުކޮށްދެއްވުމަށް ވެސް ރައީސުލްޖުމްހޫރިއްޔާގެ މެސެޖުގައި އެދިވަޑައިގެންފައިވެ އެވެ.
މިދިޔަ ޖޫން މަހު އޯލް އިންޑިއާ އިންސްޓިޓިއުޓް އޮފް މެޑިކަލް ސައިންސެސް (އެއިމްސް)ގައި އެޑްމިޓު ކުރީ ކިޑްނީ އިންފެކްޝަނެއް ޖެހުމާ ނޭވާލަން އުނދަގޫވުމުގެ ސަބަބުންނެވެ.
ވަޖްޕާއީއަކީ އިންޑިއާގެ ބޮޑުވަޒީރުކަމުގެ މަގާމު އަދާކުރި، ބާރަތިޔާ ޖަނަތާ ޕާޓީއަށް ނިސްބަތްވާ ފުރަތަމަ ބޭފުޅާ އެވެ. ވަޖްޕާއީ ވަނީ އިންޑިއާގެ ބޮޑުވަޒީރުކަން ތިން ފަހަރެއްގެ މަތިން ކުރައްވައިފަ އެވެ. އެއީ 1996 ވަނަ އަހަރު 13 ދުވަހަށާއި 1998 ވަނަ އަހަރުން ފެށިގެން 13 މަހަށާއި 1999 އިން ފެށިގެން ހަ އަހަރަށެވެ.
ވަޖްޕާޔީއަށް 1994 ވަނަ އަހަރު ގާނޫނު ހަދާ މަޖިލީހުގެ ބެސްޓް ޕާލަމެންޓޭރިއަންގެ ލަގަބު ލިބިވަޑައިގެންނެވި އިރު، އިންޑިއާގެ އެންމެ މަތީ މަދަނީ ޝަރަފު، ބާރަތު ރަތުނާ ވެސް 2015 ވަނަ އަހަރު ލިބިވަޑައިގަތެވެ.