ޏ. ފުވައްމުލަކަށް އުފަން، މިހާރު އުމުރުން 21 އަހަރުގެ އަހުމަދު މުސައްނިފް ރަޝީދަކީ ހިތްހެޔޮ މިޒާޖެއްގެ ޒުވާނެކެވެ. ސްކޫލު ދައުރުގައި ވެސް ކިޔެވުމަށް މޮޅު އަދި އިތުރު ހަރާކަތްތަކުގައި ވެސް ބައިވެރިވެ ކުޅިވަރުތަކުގައި ވެސް ފާހަގަކޮށްލެވޭ މޮޅު ކުއްޖެކެވެ.
ރަށު ސްކޫލުން ކިޔެވުމަށް ފަހު، އިތުރު ތައުލީމް ހޯދުމަށް މުސައްނިފްމާލެއަށް ކުރި ދަތުރުވީ އޭނާގެ ހަޔާތަށް ދިމާވި އެންމެ ބިރުވެރި އަދި އެންމެ ހިތްދަތި ދުވަސްވަރަށެވެ. ކިޔެވުން މެދުކެނޑުމަށް މަޖުބޫރުވީ އޭނާގެ ބަލި ހާލަތުގެ ސަބަބުންނެވެ. ހާލަތު ބަދަލުވެގެންދިޔައީ ވައިރޯޅިއެއްހާ އަވަހަށެވެ.
"އެއް ދުވަހު ހެނދުނު ހޭލި އިރު ވަރަށް ބޮޑަށް ބަނޑުގައި ރިއްސާތީ އުޅުނީ. މާލެއިން ދައްކާފައި ވަކި ނުބުނޭ އެއްޗެކޭ. ބޭސްދީފައި ފޮނުވާލީ. ދެން އޭރު މުސައްނިފް ބައްޕަ އިންޑިއާއަށް ދިޔައިރު އޭނަ ވެސް ގޮވައިގެން ދައްކާލަން ދިޔައީ،" މުސައްނިފްގެ މަންމަ އައިމިނަތު ސައުދުﷲ، ސަން ކުލުނު އަށް މައުލޫމާތު ދެމުން ބުންޏެވެ.
އިންޑިއާއަށް ދިޔައިރު ބަނޑުގައި ރިއްސުން އެއްކޮށްހެން ރަނގަޅުވެގެން ދިޔަ ކަމަށާއި އެކަމުގެ ސަބަބުން އޭނާ އޭރު ޑަކްޓަރަށް ދައްކަން ބޭނުންނުވި ކަމަށް މުސައްނިފްގެ މަންމަ ބުންޏެވެ.
"ދެން މާލެ އައީ. ދުވަސްކޮޅެއް ފަހުން އަނެއްކާ ވެސް ބަނޑުގައި ރިއްސަން ފެށީ. އޭރު ވަގުތުން ޑަކްޓަރަށް ދެއްކީ. ޓެސްޓް ހަދައި ނަތީޖާ ލިބުނީމަ ބުނީ ކިޑްނީ މައްސަލަ އުޅޭ ކަމަށް ބުނެ ބޭސްދިން،" އައިމިނަތު ބުންޏެވެ.
ކިޑްނީގެ މައްސަލަ އުޅޭކަން އެނގުނު ހިސާބުން އިންޑިއާއަށް ވަގުތުން ފުރިކަމަށާއި އިންޑިއާއަށް ދެއްކުމުން ކިޑްނީ "ފަންކްޝަން ނުކުރާ ކަމަށާއި ކިޑްނީ ކުޑަ ކަމަށް" ޑޮކްޓަރުން ބުނި ކަމަށް މުސައްނިފްގެ މަންމަ ބުންޏެވެ.
"އެކޮޅުން ދެއްކުމުން ބޭސްދިން. ދެން ގަވައިދުން ބޭސް ކަމުން އައީ. ބޭސް ގަވައިދުން ކެއީމަ މަޑު މަޑުން ސްޓޭބަލްވަމުން އައީ. ދެން އަނެއްކާ ވެސް މާލެ އައީ،"
ބޭސްދިން ފަހުން ގަވައިދުން ބޭސް ކެއި ނަމަވެސް މިދިޔަ އަހަރު ފަހުކޮޅު މުސައްނިފް ވަރަށް ބޮޑަށް ބަލިވި ކަމަށް އޭނާގެ މަންމަ ބުންޏެވެ. އެ ފަހަރު ޑަކްޓަރަށް ދައްކައި އަލުން ޓެސްޓް ހެދި ކަމަށް ވެސް އޭނާގެ މަންމަ ބުންޏެވެ.
"އެފަހަރު އެނގުނީ ކިޑްނީ ފެއިލްވެފައިކަން ވެސް. ދެ ކިޑްނީ ވެސް ފެއިލް ވެފައިވާ ކަމަށް ޑަކްޓަރުން ބުނި. ދުވަހަކު ވެސް އުންމީދުކުރި ފަދަ ޖަވާބެއް ނޫން މިއީ. ނޭނގެ އެވަގުތުކޮޅުވީ ގޮތެއް ވެސް. ގަބޫލު ވެސް ނުކުރެވުނު،" އައިމިނަތު އަސަރާ އެކީ ބުންޏެވެ.
ދެ ކިޑްނީ ވެސް ފެއިލްވިކަން ޔަގީންވި ހިސާބުން ޑައިލަސިސް ހެދުމަށް އަވަސްވި ކަމަށާއި ފުރަތަމަ ޑައިލަސިސް ހެދިއިރު "ބްލީޑް" ވި ކަމަށް މަންމަ ބުންޏެވެ.
އައިމިނަތު ބުނީ އެފަހަރު ވެސް ލަސްނުކޮށް އިންޑިއާއަށް ދިޔަ ކަމަށާއި އެކޮޅަށް ދިޔައިރު ދަރިފުޅުގެ ހާލު ވަރަށް ސީރިއަސް ކަމަށެވެ. އިންޑިއާއަށް ގޮސް ފަރުވާ ކުރުމުން މުސައްނިފް އަނެއްކާ ވެސް "ސްޓޭބަލް"ވި ކަމަށް އޭނާ ބުންޏެވެ.
ހަފްތާ އަކު ތިން ފަހަރު ޑައިލަސިސް ހަދަމުން އަންނަ މުސައްނިފަށް ކިޑްނީ ޑޯނާއެއް ހަމަޖެހިފައިވާ ކަމަށް ވެސް އޭނާގެ މަންމަ ސަން ކުލުނަށް ބުންޏެވެ.
"ޑަކްޓަރުން ލަފާ ދެއްވަނީ އަވަހަށް ކިޑްނީ ޓްރާންސްޕްލާންޓް ހެދުމަށް. މިހާރު އާސަންދަ ވެސް ހަމަޖެހިފައި އިނީ. އަންނަ މަހު އިންޑިއާއަށް ފުރާނަން. ޓްރާންސްޕްލާންޓް ހަދާފައި އެކޮޅުގައިޖެހޭ ހަ މަސް ދުވަސް މަޑުކުރަން،"
ޓްރާންސްޕްލާންޓް ހަދަން ދިޔުމަށް ހަމަޖެހިފައި ވަނީ އިންޑިއާގެ މަނިޕާލް ހޮސްޕިޓަލަށެވެ.
"ލޮނު އަދި ތެޔޮ އެކުލެވޭ ބާވަތްތައް މަދުން ބޭނުންކުރަން އަންގާފައި އޮތީ. ކުޑަތަންކޮޅަކަށް ހިނގާލާއިރަށް ވަރުބަލިވޭ. އަލުވި، ފެހިކަން ގަދަ ފަތް ކެއުމަށް ޑަކްޓަރުން އިރުޝާދު ދެނީ،"
ތިން ކުދިންގެ އާއިލާގެ އެންމެ ދޮށީ ކުއްޖަކީ ވެސް މުސައްނިފެވެ. ކިޑްނީ ފެއިލްވި ފަހުން ހިތުގެ މައްސަލަ ވެސް ހުންނަ މުސައްނިފް އެކަމަށް ވެސް ބޭސްކަ އެވެ.
"ކުރިން އޭނާ އަކީ ހަމަ ވަރަށް ފިޓް ކުއްޖެއް. ކުޅިވަރު ކުޅޭނެ. ފުޓްބޯޅައަށް ވަރަށް ފޯރި ހުންނާނެ. އާއިލާއާއި ރަހުމަތްތެރިންނަށް ވިސްނާ، ބަސްއަހާ ރަނގަޅު ކުއްޖެއް އެއީ، އެކަމަކު ބަލި ހާލު ހުރި ގޮތުން މި ފަހަރު ވޯލްޑްކަޕްގެ އެންމެ މެޗެއް ވެސް ނުބެލުނު،" ދަރިފުޅުގެ ހާލަތަ ގުޅޭ ގޮތުން އައިމިނަތު ބުންޏެވެ.
ގިނަ ދުވަސްތަކެއް ވަންދެން ބޭރުގައި މަޑުކުރަން ޖެހުނު ނަމަވެސް މިއަދު މުސައްނިފްގެ އާއިލާގެ އެވަރުގެ ތަނަވަސްކަމެއް ނެތެވެ. އާސަންދައިން ބޭސްފަރުވާގެ ކަންތައްތައް ހަމަޖެހުނު ނަމަވެސް އެކޮޅުގައި ހުރުމާއި ކެއުމަށް ގިނަ ޚަރަދުތަކެއް ހިނގަ އެވެ.
އައިމިނަތު އެދެނީ އޭނާގެ ފުރާނައަށް ވުރެ ވެސް ބޮޑަށް ލޯބިވާ އެ ދަރިފުޅަށް ތިޔަ ބޭފުޅުން ކުޑަނަމަވެސް މާލީ އެހީތެރިކަމެއް ދިނުމަށެވެ.
އަހުމަދު މުސައްނިފަށް އެހީތެރިވުމަށް
- ފޯނު ނަންބަރު: 7962299 (އައިމިނަތު ސައުދުﷲ/ މުސައްނިފްގެ މަންމަ)
- ބީއެމްއެލް އެކައުންޓް ނަންބަރު: 7730000020049 (މުސައްނިފްގެ ބައްޕަ މުހައްމަދު ރަޝީދު އާ ގުޅިފައިވާ އެކައުންޓް ނަންބަރު)
- ޑޮލަރު އެކައުންޓް ނަންބަރު: 7730000122276 (މުސައްނިފްގެ ބައްޕަ މުހައްމަދު ރަޝީދު އާ ގުޅިފައިވާ އެކައުންޓް ނަންބަރު)
ނޯޓް: ސަންގެ މި ސެގްމެންޓްގެ ދަށުން ގެނެސްދޭ ފަރާތްތަކަށް އެހީތެރިވުމުގެ ކަންކަން އެ އާއިލާއާ ގުޅިގެން ކުރިއަށް ގެންދިއުން އެދެމެވެ. ފައިސާގެ އެއްވެސް ކަމެއްގައި ސަން އިން ބައިވެރިއެއް ނުވާނެއެވެ. ސީދާ އާއިލާއަށް އެހީތެރިވެ ދެއްވާށެވެ.
އެހީތެރިކަމަށް އެދޭ ފަރާތްތަކުން ސަން ކުލުނުގައި ބައިވެރިވުމަށް 9992747 ނުވަތަ 9982747 އަށް ގުޅައިގެން ކުރިއަށް ގެންދެވުން އެދެމެވެ.