ކުރިއަށް އޮތް ދިވެހި ޕްރިމިއާ ލީގަށް ތައްޔާރުވަމުންދާ އީގަލްސްއިން އިނގިރޭސިވިލާތަށް އުފަން އޮސްޓްރޭލިއާގެ ފޯވަޑެއް ޓީމަށް ގެނެސްފިއެވެ.
އީގަލްސްއަށް ގެނެސްފައިވާ ފޯވަޑަކީ އުމުރުން 23 އަހަރުގެ ޑެނިއަލް ޑިކްޒަންއެވެ. ވިކްގްގެ އިތުރުން ސްޓަރައިކަރަކަށް އަދި އެޓޭކިން މިޑްފީލްޑަރަކަށްވެސް ކުޅޭ ޑިކްޒަން އަކީ އޭނާގެ ޔޫތު ކެރިއަރު އިނގިރޭސިވިލާތުގައި ހޭދަކޮށްފައިވާ ކުޅުންތެރިއެކެވެ.
އެގޮތުން އޭނާ ވަނީ އިނގިރޭސި ވަރުގަދަ އެކަޑެމީތަކުގައި ހިމެނޭ މިޑްލްސްބަރާގެ އެކަޑެމީއާއި ކާލިސިލް ޔުނައިޓެޑް އެފްސީގެ ރިޒާވް ޓީމާއި ޒުވާން ޓީމާއެކުވެސް ކުޅެފައެވެ. އެޓީމާއެކު ޑިކްޒަން ވަނީ އިނގިރޭސި އެފްއޭގެ ޔޫތު ކަޕްވެސް ކުޅެފައެވެ.
އިނގިރޭސިވިލާތުގެ ނޮން ލީގު ފުޓުބޯޅަ ކުޅެފައިވާ ޑިކްޒަން ވަނީ އޮސްޓްރޭލިއާގެ ދެވަނަ ޑިވިޝަންގެ ކްލަބުތަކަށް ކުޅެފައެވެ. އެގޮތުން އޭނާ އެންމެފަހުން ކުޅެފައި ވަނީ އޮސްޓްރޭލިއާގެ ނޭޝަނަލް ލީގުގެ ސަބް ޑިވިޝަން އެންމެ މަތީ ލެވެލްގެ ލީގެއް ކަމަށްވާ ވިކްޓޯރިއާ ނޭޝަނަލް ޕްރިމިއާ ލީގުގެ ނޯތު ކޯޓު ސިޓީއަށެވެ. އެޓީމާއެކު އޭނާ ވަނީ މިދިޔަ ސީޒަންގެ ވެސްޓާން އޮސްޓްރޭލިއާގެ ގައުމީ ލީގު (ވިކްޓޯރިއާ ނޭޝަނަލް ޕްރިމިއާ ލީގު) ކާމިޔާބުކޮށްފައެވެ.
ޕްރިމިއާ ލީގަށް ޓީމު ވަރުގަދަ ކުރުމުގެ ގޮތުން އީގަލްސްއިން ވަނީ އުޒުބަކިސްތާންގެ 19 އަހަރުން ދަށުގެ ގައުމީ ޓީމަށް ކުޅެފައިވާ ޑިފެންޑަރެއް ކަމަށްވާ އުމުރުން 22 އަހަރުގެ އަބްދުލްރަސުލް ކޮމިލޯވްވެސް ޓީމަށް ގެނެސްފައެވެ.
މާލޭ ލީގަށް އީގަލްސްއިން ނުކުތީ އާ ފޯވަޑަކާވެސް އެކުގައެވެ. އެޓީމަށް ގެނައި ބްރެޒިލްގެ ލުއިޒް އެޑުއާޑޯ ވަނީ މިހާތަނަށް ލީގުގައި ތަފާތު މޮޅު ކުޅުމެއް ދައްކައިފައެވެ. އެގޮތުން އޭނާ ވަނީ މާލޭ ލީގުގައި ކުޅުނު 13 މެޗުން 16 ގޯލް ޖަހައިފައެވެ. އޭނާއަކީ ލީގުގެ ޓޮޕް ސްކޯރާވެސް މެއެވެ.