ލ. މާބައިދޫ ބަނދަރު ހެދުމުގެ މަސައްކަތުގެ 79 ޕަސެންޓް ނިންމާފައިވާ ކަމަށް އެ މަސައްކަތްކުރާ މޯލްޑިވްސް ޓްރާންސްޕޯޓް އެންޑް ކޮންޓްރެކްޓިންގ ކޮމްޕެނީ (އެމްޓީސީސީ)އިން ބުނެފިއެވެ.
ސަރުކާރުން މި މަސައްކަތް އެމްޓީސީސީއާ ހަވާލުކޮށްފައިވަނީ 2013 ވަނަ އަހަރުގެ އޭޕްރީލް މަހުގެ 21 ވަނަ ދުވަހުއެވެ. މި މަޝްރޫއުގެ ދަށުން އެ ރަށު ހުޅަނގު ފަރާތުގައި 210 މީޓަރު ދިގު އަދި 78 މީޓަރު ފުޅާ ބަނދަރެއް ހަދަން ވަނީ ހަވާލުކޮށްފައެވެ. އަދި 275 މީޓަރުގެ ބޭރުތޮށްޓެއް ލުމަށް ވެސް ވަނީ ހަވާލުކޮށްފައެވެ. މީގެ އިތުރުން ރިވެޓްމަންޓް ޖެހުމަށްވެސް ވަނީ މަޝްރޫއުގެ ތެރެއިން އެމްޓީސީސީއާ ހަވާލުކޮށްފައެވެ.
މި މަސައްކަތާ ގުޅޭގޮތުން އެމްޓީސީސީގެ ޕްރޮޖެކްޓް ޑިޕާޓްމަންޓްގެ ހެޑް ރިޓަޔާޑް ކޮމިޝަނަރ އޮފް ޕްރިޒަން މުހައްމަދު ހުޝާމް ވިދާޅުވީ ކުއޭ ވޯލްގެ ތިން ބަޔަކާއި ބަނދަރުގައި ހަދާ ފެން ހިންދުމުގެ ނިޒާމް އަދި އެ ސަރަހައްދު ޕޭމަންޓްގެ މަސައްކަތް އެެއްކޮށް ނިމިފައިވާ ކަމަށެވެ. އަދި ބައްތި ހަރުކުރުމުގެ މަސައްކަތްވެސް ނިމިފައިވާ ކަމަށް ވިދާޅުވިއެވެ.
L.Maabaidhoo harbor project | Harbor dredging is ongoing, with 30% of the work completed, & construction of the breakwater is 70% complete. Harbor pavement, & harbor drainage, & all 3 components of the quay wall, & installation of the harbor lights are at 100% completion. pic.twitter.com/vW89ng2x7p
— MTCC Projects (@projectsmtcc) June 5, 2018
ހުޝާމް ވިދާޅުވީ މިހާރު ކުރިއަށްދަނީ ފަޅު ފުން ކުރުމުގެ މަަސައްކަތް ކަމަށާއި އެ މަސައްކަތުގެ 30 ޕަސެންޓް މަސައްކަތް ނިމިފައިވާ ކަމަށެވެ. އަދި ބޭރު ތޮށީގެ 70 އިންސައްތަ މަސައްކަތް ނިމިފައިވާ ކަމަށާއި ޖުލައި މަހުގެ ނިޔަލަށް ބަނދަރު ނިންމައި ހަވާލުކުރާނެ ކަމަށް ހުޝާމް ވިދާޅުވިއެވެ.
އާބާދީގައި 1108 މީހުން އުޅޭ މާބައިދޫގައި ހަދާ ބަނދަރަކީ ޖުމްލަ 45 މިލިއަން ރުފިޔާ ހަރަދުކޮށްގެން ހަދާ ބަނދަރެކެވެ.