އެސްޓިއޯ މާލޭ ލީގުގައި މިހާތަނަށް ކްލަބު ވެލެންސިއާއިން 10 މެޗު ކުޅެފައިވާ އިރު، އެޓީމަށް ލިބިފައިވަނީ އެންމެ ޕޮއިންޓެކެވެ.
ދެވަނަ ބުރުގައި ރޭ ޓީސީ ސްޕޯޓްސް ކްލަބު އަތުން 4-0ގެ ނަތީޖާއަކުން ބަލިވެފައިވާ އިރު، ޕްރިމިއާ ލީގަށް ދިއުމަށް އެޓީމަށް ވަނީ ފުރުސަތު ކުޑަވެފައެވެ. މާލޭ ލީގުގައި ކުޅޭ އަށް ޓީމުގެ ތެރެއިން ގަދަ ހަ ޓީމު ޕްރިމިއާ ލީގަށް ދާ އިރު، ވެލެންސިއާއަށް މޮޅެއް ހޯދަން މަޖުބޫރެވެ.
ވެލެންސިއާއިން ރޭގެ މެޗުގެ ފުރަތަމަ ހާފްގައި އޯގަނައިޒް ކޮށްގެން ކުޅުނު ނަމަވެސް މެޗުގެ ފަހު ހާފްގައި ޓީސީން ވަނީ ހަތަރު ގޯލް ޖަހައި ވެލެންސިއާ އިތުރަށް މާޔޫސް ކޮށްލައިފައެވެ. މިހާތަނަށް ލީގުގައި މެޗަކުން މޮޅުވެފައިނުވާ އިރު، ތަފާތު ބޮޑު ބަލިތަކާވެސް ވެލެންސިއާއާ ވަނީ ކުރިމަތިވެފައެވެ.
"މިމެޗަށްވެސް ނުކުތީ ތައްޔާރުވެގެން. އެކަމަކު ޓީމުގެ އަނިޔާގެ މައްސަލަތަކާ އެއްޗެހިވެސް ގިނަ. ސްކޮޑަށް ބަލާ އިރު، މިތިބީ ރަނގަޅު ކަހަލަ ދެތިން ކުޅުންތެރިއެއް. އެ ކުޅުންތެރިންނަށްވެސް އަނިޔާއާ ގުޅިގެން ހަމަ މޮޅު ނުވެވި މި ދަނީ،" މެޗަށްފަހު ވެލެންސިއާގެ އެސިސްޓެންޓް ކޯޗު އާދަމް އަބްދުލްލަތީފު (ލައްޗޭ) ބުންޏެވެ.
ލައްޗޭ ބުނީ ޓީމަށް އާއްމުކޮށް ދިމާވާ މައްސަލައަކީ މެޗުގެ ފަހު ވަގުތު ކޮންސަންޓްރޭޝަން ގެއްލުން ކަމަށާއި އެކަން ދިމާވަނީ ކުޅުންތެރިންނަށް ބޮޑެތި މެޗުތަކުގެ ތަޖުރިބާ މަދުވުމުން ކަމަށެވެ.
" ކޮންމެ ދުވަހަކުވެސް ވަރަށް ރަނގަޅު ހިތްހަމަޖެހޭ ކުޅުންތަކެއް ކުޅެމުން ގޮސް ފަހުވަގުތުގައި ކޮންސަންޓްރޭޝަން ގެއްލެނީ. ވާގޮތަކީ ވެލެންސިއާގައި މިތިބަ ގިނަ ކުޅުންތެރިންނަކީ މިކަހަލަ ބޮޑެތި މެޗުތަކަކުން ފުރުސަތުވެސް ދީފައި ނުވާ ކުޅުންތެރިންނަށް ވީމަ،" ލައްޗޭ ފާހަގަކުރިއެވެ.
އަންނަ ސީޒަންގެ ދިވެހި ޕްރިމިއާ ލީގަށް ކޮލިފައިވުމުގެ އުންމީދާ ގުޅޭ ގޮތުން ސުވާލު ކުރުމުން ލައްޗޭ ބުނީ އަދިވެސް މަސައްކަތް ކުރާނީ ޕްރިމިއާ ލީގަށް ކޮލައިފުމަށް ކަމަށެވެ.
"ކޮލިފައިވުމަށްވުރެ ބޮޑަށް މީގެ ވިސްނަންވީ ބޯޅަ ކުޅެންޏާ މޮޅުވާން އެބަޖެހޭކަން. ކޮލިފައިވުންވެސް މުހިއްމު، މޮޅެއް ލިބިގެން އެކަންވެސް ވާނީ. ޕްރިމިއާ ލީގަށް ދެން ކޮލިފައިވުމަަށް އޮތީ ކުޑަ ފުރުސަތެއް. އެކަމަކުވެސް އަޅުގަނޑުމެން އަބަދުވެސް ބަލާނީ އަޅުގަނޑުމެންގެ ޓީމަށް ހަނިފުރުސަތަކުންވެސް ކޮލިފައިވާނެ ކަމަށް. ކޮލިފައި ވެގެން ކުރިއަށްދާން،" ލައްޗޭ ބުންޏެވެ.
ރޭގެ މެޗަށް ޓީސީ ނުކުތީ ފުރަތަމަ 11އަށް ބަދަލުތަކަކާ އެކުގައެވެ. އެގޮތުން ކާޑު ހަމަވުމުގެ ސަބަބުން އަބްދުﷲ ހަނީފް (ބެންޖޯ)އާއެކު އަހުމަދު ރިލުވާން (ބެން)ވެސް ހުރީ ސަސްޕެންޝަނުގައެވެ. އަދި ޓީސީގެ ކެޕްޓަން އަހުމަދު ފައްރާހު (ފައްރަ)އާއި އިބްރާހީމް ވަހީދު (އިއްބެ)ވެސް ރޭގެ މެޗުގައި ފެނިގެންދިޔައީ ބެންޗުންނެވެ. އަދި މުހައްމަދު އައްޒާމްވެސް ރޭގެ މެޗުގެ ސްކޮޑުގައި ހިމެނިފައި ނުވާ އިރު، އެ ކުޅުންތެރިންގެ ބަދަލުގައި ޓީސީގެ ކޯޗު މުހައްމަދު ނިޒާމް (ނިޒާމްބެ)ވަނީ ޒުވާން ތިން ކުޅުންތެރިން ކަމަށްވާ ނިޝާމް މުހައްމަދު ރަޝީދު އާއި މުހައްމަދު މާޒިން އަދި މުހައްމަދު އަޖުފާންއަށްވެސް ފުރުސަތު ދީފައެވެ.
"މުހިއްމުވީ މެޗުން މޮޅުވާން. ތިން ޕޮއިންޓް ހޯދަން މެޗަށް ނުކުތީ. ދެން އަލަށް ދަނޑު މައްޗަށް ނެރުނު ކުޅުންތެރިިންގެ ފަރާތުން ރަނގަޅު ކުޅުމެއް ފެނުނު. އެއީ ވަރަށް ބޮޑު ހިތްހަމަޖެހުމެއް،" ރޭގެ މެޗަށްފަހު ނިޒާމްބެ ބުންޏެވެ.
މާލޭ ލީގުގެ ދެވަނަ ބުރުގެ މެޗެއް މިރޭވެސް އޮންނާނެއެވެ. މިރޭ 10:00ގައި ކުޅޭ އެ މެޗުގައި ބައްދަލުކުރާނީ ވިކްޓަރީ ސްޕޯޓްސް ކްލަބާއި ކްލަބު ގްރީން ސްޓްރީޓްސްއެވެ.