ގުދުސް (ފެބްރުއަރީ 21): އިސްރާއީލްގެ ބޮޑުވަޒީރު ބެންޖަމިން ނަތަންޔާހޫއާ ގާތް ފަރާތަކުން އޭނާއާ ދެކޮޅަށް ހެކިބަސް ދޭން ނިންމާފައިވާ ކަމަށް އިސްރާއީލުގެ މީޑިއާތަކުން ބުނެފި އެވެ.
އިސްރާއީލުގެ މީޑިއާތަކުގައިވާ ގޮތުން އެގައުމުގެ ކޮމިއުނިކޭޝަން މިނިސްޓްރީގެ ކުރީގެ ޑިރެކްޓަރު ޝްލޮމޯ ފިލްބާ ވަނީ ކޮރަޕްޝަނުގެ މައްސަލައަކާ ގުޅިގެން ނަތަންޔާހޫއާ ދެކޮޅަށް ހެކިބަސް ދޭން އެއްބަސްވެފައެވެ.
ފިލްބާގެ އިތުރުން ނަތަންޔާހޫގެ ކުރީގެ ތަރުޖަމާނަކު ހައްޔަރުކޮށްފައި ވަނީ މަޝްހޫރު ނޫހެއް ކަމަށްވާ ވައްލާގައި ސަރުކާރާ އެއްކޮޅަށް ހަބަރު ލިޔުމަށް އެނޫހުގެ ވެރިޔާއާ އެކު ހެދި އެއްބަސްވުމަކާ ގުޅިގެންނެވެ. އެއެއްބަސްވުމުގެ ދަށުން ނަތަންޔާހޫގެ ސަރުކާރުގައި ހިމެނޭ ބައެއް ފަރާތްތަކުން ވަނީ ނޫހުގެ ވެރިޔާއަށް ފައިދާވާ ފަދަ ގަވާއިދުތަކެއް ފާސްކުރުމަށް ތާއިދު ކޮށްފައި ކަމަށް ތުހުމަތުތަކުގައިވެ އެވެ.
އަދި އެތަހުގީގާ ގުޅުން ހުރި ތުހުމަތުތަކެއް ނަތަންޔާހޫގެ މައްޗަށް ކޮށްފައި ނުވި ނަމަވެސް އެމައްސަލާގައި އޭނާއާ ސުވާލު ކުރާނެ ކަމަށް އިސްރާއީލުގެ މީޑިއާތަކުން ބުނެ އެވެ.
ނަތަންޔާހޫގެ އަރިސް ފަރާތްތަކެއް ހައްޔަރު ކޮށްފައި ވަނީ ކޮރަޕްޝަނުގެ ދެ މައްސަލައަކާ ގުޅިގެން އޭނާގެ މައްޗަށް ދައުވާ ކުރެވޭ ވަރަށް ހެކި ލިބިފައިވާ ކަމަށް އިސްރާއީލް ފުލުހުން ބުނި ފަހުންނެވެ. (އޭޕީ)