(އައްޑޫ ސިޓީއިން) -- ދެކުނުގެ މައި މަރުކަޒުގެ ގޮތުގައި އޮތް މި ސިޓީ ހުރިހާ ގޮތަކުންވެސް ރާއްޖޭގެ އެހެން ސަރަހައްދުތަކާ ވަރަށް ތަފާތެވެ. މި ސިޓީ އަކީ ޖޯގުރަފީގެ ގޮތުން ތަފާތުވެފައި، ތާރީހީގޮތުން މުއްސަނދި ސިޓީއަކަށް އެކެވެ. މުޅި ރާއްޖެއިންވެސް ބޭރުގެ މެހެމާނުންނަށް "ސަން، ސޭންޑް އެންޑް ސީ" ވިއްކާ އިރު، އައްޑު އަތޮޅަށް އޮތް ހާއްސަކަމަކީ، "ސްޓޯރީޒް" ނޫނީ އައްޑޫގެ ވާހަކަތަކެވެ. މިހާރު ރާއްޖެ ޕްރޮމޯޓް ކުރާ ތިން އެސްގެ ބަދަލުގައި މި ސިޓީގެ ޕްރޮމޯޝަންގައި އަޅުވަން ޖެހެނީ ހަތަރު އެސް އެވެ. ފަހަތަށް "ސްޓޯރީޒް"ގެ އެސް އިތުރު ކުރަން ޖެހެނީ އެވެ. އެހެންވީމާ، އައްޑޫ ޕްރޮމޯޓް ކުރަން ޖެހެނީ ހަތަރު އެސްއާ އެކު އެވެ.
ބިމުގެ މުއްސަނދިކަމާއި އާބާދީ ބޮޑު ނަމަވެސް، މި ސިޓީގެ ޓޫރިޒަމް ކުރިއަރާ ގޮތެއް އަދި ނުވެ އެވެ. ރާއްޖޭގެ ޓޫރިޒަމްގެ ހިއްސާގައި މި ސިޓީގެ ބައިވެރިވުން ނެތޭ ބުނާހާ ކުޑަ އެވެ. ރާއްޖޭގެ އެކި ހިސާބުތަކުގައި ހިންގާ ރިސޯޓުތަކުގައި އައްޑޫގެ އެތައް ރައްޔިތުންނެއް ވަޒީފާގައި ނެތް ވާހަކައެއް ނޫނެވެ. އައްޑޫގައި ތިބެގެން ނޫނީ ކައިރީގައި އެ ފުރުސަތު ނެތީއޭ ބުނާހާ ވެސް ފުރުސަތުތައް ކުޑަ އެވެ. ސަބަބަކީ، މަސައްކަތް ކުރާނެ ރިސޯޓުތަކާއި ޓޫރިސްޓް އެނދުތައް މި ސިޓީގައި ތަރައްގީވެ ފުޅާވަމުން ނުދަނީ އެވެ. މި ސިޓީގެ ޓޫރިޒަމް މިވަނީ ފާޑަކަށް ގާވެފަ އެވެ.
ޖުމްލަ 120 އަށް ވުރެ ގިނަ ރިސޯޓާއި ހޮޓާ ރާއްޖޭގެ އެކި ކަންކޮޅުތަކުގައި ހިންގާ އިރު، ވަސީލަތްތަކުގެ ގޮތުން އެންމެ މުއްސަނދި މި ސިޓީގައި އޮތީ އެންމެ ދެ ރިސޯޓާއި އެއް ހޮޓަލާއި ހައެއްކަ ގެސްޓްހައުސެވެ. އެނދުގެ އަދަދު ހާހަކަށް އަރަނީ ކިރިޔަކިރިޔާ އެވެ.
އެހެން ނަމަވެސް މިއީ ހަމައެކަނި އެނދު އިތުރުކޮށްގެން ވާން އޮތް ކަމެއް ވެސް ނޫނެވެ. މިއީ އެއް ބަޔަކު އަނެއްބަޔަކު ގުޅިލާމެހިގެން އެކުގައި، ގިނަ ސްޓޭކްހޯލްޑަރުންތަކެއްގެ ފަރާތުން ހިނގާ ގިނަ މަސައްކަތްތަކަކުން ކުރިއަރާދާން އޮތް ސިނާއަތެކެވެ. އެހެން ވީއިރު، އައްޑޫގެ ޓޫރިޒަމަށް މަދުވެގެން މި އުޅެނީ ކޮން ކަމެއް ހެއްޔެވެ؟
އައްޑޫ އަތޮޅު އިސްމެހެލާ ހެރައިގައި - ސައުތު ޕާމް ބީޗު ރިސޯޓު -- ފޮޓޯ/ ސައުތު ޕާމް ބީޗު ރިސޯޓު
އެނދު އިންތިހާއަށް މަދު!
ފަތުރުވެރި މަންޒިލެއްގެ ގޮތުގައި އައްޑޫ ޕްރޮމޯޓުކުރާ "ޑިސްކަވާ އައްޑޫ" ހަރަކާތް ހިންގާ މިސްބާހު ނަޒީރު ވިދާޅުވި ގޮތުގައި، މި ސިޓީއަކީ ހަގީގަތުގައިވެސް ތަފާތު، މުއްސަނދި ތަނެކެވެ. އެކަމަކު އައްޑޫ އިޝްތިހާރު ކުރަން ޖެހޭ ގޮތަށް، އައްޑޫ އިޝްތިހާރު ނުކުރެވެނީ އެވެ. މީގެ އިތުރުން ޓޫރިޒަމަށް ކުރިމަތިވެފައިވާ ޒަމާންވީ ހުރަސްތައް އަދިވެސް ފޫއަޅުވާނުލެވެނީ އެވެ.
"ވަރަށް ގިނަ ސަބަބުތަކެއް އެބަހުރި. އޭގެ ތެރޭގައި އެކްސެސިބަލްވުމުގެ [ދަތުރުކުރުމުގެ] ޗެލެންޖުތަކެއް އެބަހުރި. ސްރީލަންކަން އެއާލައިންސް އައްޑުއަށް އަންނަން ފެށުމުން އުންމީދު އާވި. އެކަމަކު ސްރީލަންކަންއިންވެސް ސްޓްރަގްލްކުރަމުން އެ ދަނީ މިކަން ދެމެހެއްޓުމަށް،" އޭނާ ވިދާޅުވި އެވެ.
މިހާރު އައްޑޫގައި އެންމެ ދެ ރިސޯޓާއި ހޮޓަލެއް ހިންގާ އިރު، މިސްބާހު ވިދާޅުވި ގޮތުގައި މިއީ މާ މަދު މިންވަރެކެވެ.
އައްޑޫ ގަން އިންޓަނޭޝަނަލް އެއާޕޯޓް -- ސަން ފޮޓޯ/ ފަޔާޒު މޫސާ
"އެއާލައިނުތަކަށްވެސް އައްޑޫ ވިއްކުމަށް ޗެލެންޖިންގް ވަނީ އައްޑޫގައި މިޑް މާކެޓް ދަތުރުވެރީނަށް ތަންތަން ނެތުން. އަދި ފުދޭ މިންވަރަށް އެނދު ނެތީމާ. އެންމެ ދެ ރިސޯޓުން ސަސްޓެއިނެއް ނުވޭ،" އޭނާ ވިދާޅުވި އެވެ.
މީގެ ކުރީގެ ސަރުކާރުތަކުންވެސް އައްޑޫ ސިޓީގައި ޓޫރިޒަމަށް އެނދު އިތުރުކުރުމުގެ ވާހަކަތައް ދައްކައި، ހިސާބު ޖަހައި ހެދި އެވެ. ތްރިޑީ ޑިޒައިންތަކާ އެކު ކުލަ ޖައްސާފައި ހުރި މޮޅެތި ތަސްވީރުތައް ދެއްކި އެވެ.
ރައީސް އިބްރާހިމް މުހައްމަދު ސޯލިހުގެ ސަރުކާރުން ވައުދުވީ އައްޑޫއަށް 8،000 އެނދެވެ. އޭގެ ތެރެއިން 4،000 އެނދު ތަރައްގީކުރުމަށް ޓޫރިޒަމް ޕްރޮޕަޓީތައް ހެދުމުގެ ހުއްދަ ދިނުމަށް ސަރުކާރުން މިހާރު ވަނީ ނިންމާފަ އެވެ. ޓޫރިޒަމުގެ ބޭނުމަށް އައްޑޫގެ ހަ ރަށަކުން ބިން ދޫކުރަން ނިންމާފައިވެ އެވެ.
ރީތި ބީޗެއް ނެތުމުގެ ދެރަ
އައްޑޫގައި ޓޫރިޒަމުގެ ވިޔަފާރިކުރާ ފަރާތްތަކުން ބުނާ ގޮތުގައި، ރާއްޖެ އިސްތިހާރު ކުރަނީ ރީތި ގޮނޑުދޮށްތަކުގެ މަންޒިލެއްގެ ގޮތުގައި ކަމަށްވުމުން، ރާއްޖެ އަންނަ ފަތުރުވެރިން ވެސް އަންނަނީ ރާއްޖޭގެ ދޮންވެލީގެ ގޮނޑުދޮށްތަކުގައި ވަގުތު ހޭދަކުރާށެވެ. އެކަމަކު އެމީހުންނަށް އެފަދަ ބީޗެއް އައްޑޫގައި ނެތެވެ.
އައްޑޫގައި ހުޅުވި ފުރަތަމަ ގެސްޓްހައުސް، ހިތަދޫގެ ޕެބުލްސް އިންގެ މެނޭޖަރު ސައިފުﷲ ހަމީދު ވިދާޅުވީ ރާޅާ އަޅަން އަންނަ ޓޫރިސްޓުންނަށް އައްޑޫއަކީ ރަނގަޅު މަންޒިލެއް ނަމަވެސް، ބީޗެއް ނެތުމުގެ ޝަކުވާ ޓޫރިސްޓުން އާންމުކޮށް ކުރާ ކަމަށެވެ.
"އަޅުގަނޑުމެން ކަމާ ބެހޭ ފަރާތްތަކުގައި ކިޔައިގެން މި އުޅެނީ ފަތުރުވެރިންނަށް ބިކިނީ ބީޗެއް ހަދައިދޭށޭ. ބީޗެއް ނެތުމަކީ ވަރަށް ބޮޑު ޗެލެންޖެއް،" އޭނާ ވިދާޅުވި އެވެ.
އައްޑޫ ސިޓީ ހިތަދޫ، މަރަދޫ އަދި ފޭދޫއާއި ގުޅުވާފައިވާ ލިންކް ރޯޓް -- ސަން ފޮޓޯ/ ފަޔާޒު މޫސާ
ހިތަދޫގައި ހުންނަ އަބުހަރީ ގްރޭންޑް ގެސްޓްހައުސްގެ ވެރިޔާ، އަދި އައްޑޫގެ މަޝްހޫރު ވިޔަފާރިވެރިޔާ އަބްދުﷲ ޒުހައިރު (އަބުހަރީ ޒުހައިރު)ވެސް ފާހަގަކުރެއްވި ގޮތުގައި، އައްޑޫގައި ޓޫރިސްޓުންނަށް ބީޗެއް ނެތުމަކީ މައްސަލައެކެވެ.
"އެހެން ހިސާބުތަކުގެ ރަށްތައް ކުދިވެފައި، ވަށައިގެން ބީޗެއް އޮވޭ. ގެސްޓުން ބީޗަށް ވަރަށް ޝައުގުވެރިވޭ. އެކަމަކު އައްޑޫގައި ބީޗެއް ނެތް. ގެސްޓުންނަށް ހާއްސަކޮށްގެން އާޓިފިޝަލް ބީޗެއް ވިޔަސް މިތަނުގައި ހަދަން އެބަ ޖެހޭ،" ޒުހައިރު ވިދާޅުވި އެވެ.
އައްޑޫ ސިޓީގައި ގުދުރަތީގޮތުން ފަތާތު ކަންތައްތަކަކާއި އާސާރުތަކެއް ހުރި ނަމަވެސް، ޒުހައިރު ވިދާޅުުވި ގޮތުގައި ފަތުރުވެރިންނަށް އެތަންތަން ދެއްކޭނެ ފަސޭހަ އިންތިޒާމުތަކެއް ހަމަޖެހިފައެއް ނެތެވެ.
"އަޅުގަނޑުމެން ދަން ގަމަށްވެސް. ގޮސް އިނގިރޭސީންނަށް ތަންތަން ދައްކަން. އަދި ގަމުގައި ހުންނަ ސަދާންމޯސްޓް ޕޮއިންޓަށްވެސް ގެސްޓުން ގެންދަން. އެކަމަކު މިފަދަ ތަންތަން ޝޯކޭސް ކުރެވޭނެ ފަސޭހަ ގޮތެއް ހަމަޖެހިފައެއް ނޯވޭ،" އޭނާ ވިދާޅުވި އެވެ.
މާކެޓުކުރުން ތަފާތުކުރަން ޖެހޭ!
މުޅި ރާއްޖޭގައި ޓޫރިޒަމް ހިންގަނީ ދޮންވެލީގެ ރީތި ބީޗުތަކާއި ސާފު މޫދު "ވިއްކައިގެން" ކަމުގައި ވީ ނަމަވެސް އައްޑުއަކީ ޖޯގުރަފީގެ ގޮތުން ތަފާތު ތަނެކެވެ. އައްޑޫގައި އެފަދަ ރީތި ބީޗުތައް ނުހުންނަ އިރު، އޭގެ ބަދަލުގައި އެހެން ތަފާތުތައް އެބަހުއްޓެވެ. ޓޫރިސްޓުންނަށް ނެރެ ވިއްކޭނެ އެއްޗިހިތަކެއް އެބަ ހުއްޓެވެ.
އައްޑޫގައި ގަދީމީ ޒަމާނުގެ އާސާރުތަކާއި، ދެވަނަ ބޮޑުހަނގުރާމައިގެ ދުވަސްވަރު އިނގިރޭސީން ބިނާކުރި ތަންތަނާއި ބެހެއްޓި ތަކެތި އަދިވެސް ހުރި އިރު، މިތަންތަނަކީ ރަނގަޅު ގޮތުގައި ބެލެހެއްޓި، ފަތުރުވެރީންނަށް މާކެޓުކުރެވޭނެ ތަންތަނާއި ތަކެއްޗެވެ. ބައިސްކަލު ދުއްވުމާއި އީދިގަލި ކިޅީގައި ކެނޯ ދުއްވާލުން ފަދަ ތަޖުރިބާތައް ކުރެވޭނޭ އައްޑޫ ނޭޗާ ޕާކުވެސް ހިތަދޫގައި އެބަ ހުއްޓެވެ.
އައްޑު ނޭޗާރ ޕާކް -- ސަން ފޮޓޯ/ ފަޔާޒު މޫސާ
އެހެން ނަމަވެސް އައްޑޫ، މަންޒިލެއްގެ ގޮތުގައި މާކެޓު ކުރުމުގައި މިތަންތަނަށް މާ ބޮޑު ހާއްސަކަމެއް ނުދެވެ އެވެ. އައްޑޫ ސިޓީއަށް ދަތުރުކުރުމަކީ ދުނިޔޭގެ މެދު ރޮނގު، އީކުއޭޓާ ހުރަސްކުރުމުގެ ދަތުރެއް ނަމަވެސް މިއީވެސް މާ ބޮޑަށް މާކެޓުކުރެވޭ ކަމެއް ނޫނެވެ.
"ޑިސްކަވާ އައްޑޫ"ގެ މިސްބާހު ވިދާޅުވި ގޮތުގައި، އައްޑޫއަށް ރަނގަޅު މާކެޓިންގް ސްޓްރެޓަޖީއެއް އެކުލަވާލުމަށްޓަކައި އައްޑޫ ސިޓީ ކައުންސިލުވެސް ހިމެނޭ ގޮތަށް، ކަމާ ގުޅުންހުރި ހުރިހާ ސްޓޭކްހޯލްޑަރުން އެކުގައި މަޝްވަރާއަށް އިށީންނަން ޖެހެ އެވެ. މިހާތަނަށްވެސް އެފަދަ ކަމެއް ކުރުމަށް އެއްވެސް ފަރާތަކުން އިސްނަގާފައި ނުވާ ކަމަށް އޭނާ ވިދާޅުވި އެވެ.
އުދާސްތައް އެއާޕޯޓާ ދިމާލަށް
އައްޑޫ ސިޓީގެ މޭޔަރު އަބްދުﷲ ސޯދިގު (ސޯބެ) ވިދާޅުވި ގޮތުގައި، އައްޑު އަތޮޅަކީ ފަތުރުވެރިކަން މާ ރަނގަޅަށްވެސް ތަރައްގީކުރެވޭނެ ތަނެކެވެ. އައްޑޫގައި ބިމާއި އެހެނިހެން ވަސީލަތްތައް އެބަހުއްޓެވެ. އަދި އެ ވަސީލަތްތައް ނަގާ ކޮޅަށް ޖަހައި، އިގްތިސާދީ ހަކަތަ ފޯރުކޮށްދޭނެ ހީވާގި ރައްޔިތުންވެސް އެބަ ތިއްބެވެ. ނެތީ ކޮން އެއްޗެއް ހެއްޔެވެ؟
ސޯބެގެ އުދާސްތައް ފެށެނީ އައްޑޫގައި އޮންނަ ގަން އިންޓަނޭޝަނަލް އެއާޕޯޓާ ހަމައިންނެވެ. އެތަން ތަރައްގީނުވާ ވާހަކައިންނެވެ.
ޖުލައި 18، 2019: އައްޑޫ ސިޓީގެ މޭޔާރ އަބްދުﷲ ސޯދިގް(ސޯބެ) ސަން އޮންލައިންނަށް ދެއްވި ހާއްސަ އިންޓަވިއުގެ ތެރެއިން -- ސަން ފޮޓޯ/ ފަޔާޒު މޫސާ
"އެއާޕޯޓު ހެދިފައި އޮތް މިންވަރާ ބަލާއިރު، ޖައްސާ ފްލައިޓަށް ކޭޓާކުރެވޭ ވަރަށް އާލާތެއް ނެތް. އިތުރު ތަރައްގީއެއް ނުފެނޭ. އެއީ ވަރަށް ވަރަށް ދަށް ފެންވަރުގައި ހުރި ތަނެއް. ފަޅުތެރެއިން ބިން ހިއްކާލާފައި، ބޭންކުން ލޯނެއް ނަގައިގެން ރަންވޭ އަޅާފައި އޮތީ. އޭގެ ފަހުން އިތުރަށް ތަރައްގީކުރަން ކުރި ކަމެއް ނެތޭ،" ސޯބެ ވިދާޅުވި އެވެ.
މޭޔަރު ވިދާޅުވީ، އެއީ ކުރީގެ ސަރުކާރުގެ ޕްލޭނުގެ ދަށުން ކުރި މަސައްކަތް ކަމަށާއި، މިހާރުގެ ސަރުކާރުން އައްޑޫ އެއާޕޯޓު ތަރައްގީކުރުމާ ބެހޭ ޕްލޭނެއް ގެންނަންޖެހޭ ކަމަށެވެ. ރައީސުލްޖުމްހޫރިއްޔާގެ ވައުދުފުޅަކާ އެއްގޮތަށް އައްޑުއަށް އިތުރު ޝެޑިއުލް ދަތުރުތައް ގެނައުމުގެ މަސައްކަތް އަވަހަށް ފަށަން ޖެހޭ ކަމަށް އޭނާ ދެކެވަޑައިގަންނަވަ އެވެ.
ޓޫރިޒަމް ކުރިއަރައި ދާނީ، ޓޫރިސްޓުންނަށް އައްޑު އަތޮޅަށް އާދެވޭނެ މަގު ފަހިކޮށްދީގެެން އެވެ.
ވިޔަފާރިވެރިޔާ އަބުހަރީ ޒުހައިރުވެސް ފާހަގަކުރެއްވި ގޮތުގައި، އާ އެއާލައިންތައް އައްޑޫއަށް ގެނައުމަކީ ޓޫރިޒަމް ކުރިއެރުވުމުގެ މަސައްކަތުގައި މުހިންމު ކަމެކެވެ. މިވަގުތު ދުނިޔޭގައި އެންމެ ގިނައިން ދަތުރުކޮށް ހަދަނީ މެދު ފަންތީގެ ފަތުރުވެރިން ކަމުގައި ވުމާއެކު، އައްޑުއަށް ބަޖެޓު އެއާލައިންތައް ގެނެވިދާނެތޯ ބަލަންޖެހޭކަމަށް އޭނާ ގަބޫލުކުރައްވަ އެވެ.
މިހާރު އައްޑޫއަށް ޝެޑިއުލް ދަތުރުތައް ބާއްވަނީ ސްރީލަންކަން އެއާލައިންސް އެކަންޏެވެ. އެހެން ނަމަވެސް އެންމެ މަންޒިލަކަށް ބަރޯސާވެ ދަތުރުތައް ބޭއްވުމުގެ ނޭދެވޭ އަސަރުތައް އައްޑުއަށް ލިބެމުން ދެއެވެ. މި އަހަރުގެ އޭޕްރިލް މަހުގެ ތެރޭގައި ކޮލޮމްބޯގައި ދިން ބޮމުގެ ހަމަލާތަކުގެ ސަބަބުން އެގައުމުގެ ފަތުރުވެރިކަން ވަރަށް ބޮޑަށް ވެއްޓުނު އިރު، އެކަމުގެ ސީދާ އަސަރު އައްޑޫގެ ޓޫރިޒަމަށް މި ވަނީކޮށްފަ އެވެ.
އައްޑޫގައި ޓޫރިޒަމް ވިޔަފާރިކުރާ ފަރާތްތަކާއި، ގަން އިންޓަނޭޝަނަލް އެއާޕޯޓު ހިންގާ އައްޑޫ އިންޓަނޭޝަނަލް އެއާޕޯޓު ކުންފުނިންވެސް ބުނި ގޮތުގައި ސްރީލަންކަން އެއާލައިންސްގައި އައްޑޫއަށް އަންނަ ފަތުރުވެރިން ގިނައިން އަންނަނީ ކޮލަމްބޯއާއި ރާއްޖެ ހިމެނޭ ޕެކޭޖެއްގެ ދަށުންނެވެ. އެކަމަކު ލަންކާގެ ބޮމުގެ ހަމަލާތަކަށް ފަހު އެ ދޮރު ބަންދުވީ އެވެ.
ފަށަންވީ ކިހިނެއް؟
ރާއްޖޭގެ އެންމެ ދެކުނަށް ޓޫރިޒަމް ފުޅާކޮށް، އެ ސިނާއަތުގެ ފޮނި މީރުކަމާއި ނަފާ އެ ސަރަހައްދުގެ ރައްޔިތުންނަށް ފޯރުކޮށްދިނުމަށްޓަކައި ކުރަންޖެހޭ މަސައްކަތް ބައިވަރެވެ. އުފުލަން ޖެހޭ ބުރަ ބޮޑެވެ. އެހެން ނަމަވެސް އެންމެ ފުރަތަމަ ކުރަންޖެހޭ މަސައްކަތަކީ ސަރުކާރާއި އައްޑޫ ސިޓީ ކައުންސިލާއި އައްޑޫގައި ޓޫރިޒަމް ވިޔަފާރިކުރާ ފަރާތްތަކުން މަޝްވަރާގެ މޭޒު ދޮށަށް އައިސް، ރަނގަޅު މާކެޓިންގް ޕްލޭނެއް އެކުލަވާލުމެވެ.
އައްޑޫގެ ޓޫރިޒަމްގައި ހަރަކާތްތެރިވާ ބައެއް ފަރާތްތަކުން ބުނި ގޮތުގައި މިކަން މިހާތަނަށްވެސް ނުވެ އޮތީ ސިޔާސީ އިހުލާސްތެރިކަމެއް ނުވަތަ "ޕޮލިޓިކަލް ވިލް" ނެތުމުންނެވެ.
"އައްޑޫއަކީ ވަރަށް ޕޮލަރައިޒްޑް ބަޔަކު އުޅޭ ތަނެއް. ސިޔާސީ ހިޔާލު ތަފާތުވެއްޖެނަމަ އެއްބައިވަންތަކަމެއް ނޯވޭ. އެކަމަކު ދެކުނުގެ އެހެން އަތޮޅުތަކުގެ ރައްޔިތުންނަކީ ތަފާތުތަކާއެކުވެސް، ތަރައްގީގެ މަސައްކަތެއް ނަމަ ހުރިހާ އެންމެން އެކުގައި ގުޅިގެން މަސައްކަތްކުރާ ބައެއް،" އައްޑޫގައި ޓޫރިޒަމް ވިޔަފާރި ކުރާ ޒުވާނަކު ބުންޏެވެ.
އައްޑު އަތޮޅަކީ ގުދުރަތީ، ސަގާފީ އަދި އިންސާނީ ވަސީލަތުގެ ގޮތުންވެސް ވަރަށް މުއްސަނދި އަތޮޅަކަށް ވާ އިރު، މިވަގުތު ކުރަންވީ ކަމަކީ އައްޑޫ ސިޓީ ވަކި މަންޒިލެއްގެ ގޮތުގައި މާކެޓުކުރުމުގެ މަސައްކަތް ފެށުމެވެ. އައްޑޫުއަކީ ޓޫރިޒަމަށް ޕޮޓެންޝަލް ހުރި ތަނެއް ކަމަށް ބުނާ ބުނުމުގައި ކުލަ ޖައްސައި، އެކަން ހަގީގަތަކަށް ހަދަންވީ އެވެ. ސަރުކާރުތަކުން ކުރެހި ތްރީޑީ ގްރެފިކްތައް ހަގީގަތަކަށް ހެދުން ނޫން ގޮތެއް މި ސިޓީގެ މުސްތަގުބަލަކަށް އޮތް ހެނެއް ހިއެއްނުވެ އެވެ.