އުތުރުގެ ރަށްރަށުގައި ޓޫރިޒަމް ކުރިއެރުވުމަށް ހުރި ގޮންޖެހުންތައް ބަލައި، އަދި ޓޫރިޒަމް ކުރިއެރުވުމާ ބެހޭގޮތުން މަޝްވަރާކުރުމަށް ޓުރިޒަމް މިނިސްޓަރު އަލީ ވަހީދު ތިލަދުންމައްޗަށް ވަޑައިގެންފިއެވެ.
މިނިސްޓަރު އުތުރަށް ކުރައްވާ ދަތުރުފުޅުގައި އިއްޔެ ފުރަތަމަ ވަޑައިގަތީ ހދ. ހަނިމާދޫއަށެވެ. މިނިސްޓަރު އަލީ ވަހީދު ވަނީ ހަނިމާދޫ ކައުންސިލުގެ މެމްބަރުންނާއި އެހެނިހެން ބޭފުޅުންނާ ބައްދަލުކުރައްވާފައެވެ.
މިނިސްޓަރު އަލީ މިއަދު ވަނީ ހދ. ކުޅުދުއްފުއްޓަށް ވަޑައިގެން އެރަށުގެ ކައުންސިލަރުންނާއި ބައެއް އެހެނިހެން ފަރާތްތަކާ ބައްދަލުކުރައްވާފައެވެ. އަދި ކުޅުދުއްފުށީ އެއާޕޯޓު އަޅާ ސަރަހައްދާއި، އެރަށުގެ ހޮސްޕިޓަލުވެސް ބައްލަވައިލެއްވިއެވެ.
Minister @ali20waheed 's official visit to some of the islands in Haa Alifu and Haa Dhaalu Atoll- Meeting with the Stakeholders and the island council of Haa Dhaalu Hanimaadhoo. pic.twitter.com/9bFXpS1wu7
— Ministry of Tourism (@TourismMv) February 7, 2019
ހދ. އަތޮޅަކީ ފަތުރުވެރިކަން އެންމެ މަދު އެއް އަތޮޅެވެ. އެ އަތޮޅުގައި އޮންނަނީ އެންމެ ރިސޯޓެކެވެ. އެއީ މިދިޔަ އަހަރުގެ ތެރޭ އެ އަތޮޅު ހޮނޑާފުށީގައި ހުޅުވި ހޮނޑާފުށި އައިލެންޑް ރިސޯޓެވެ. އަދި އެންމެ އުތުރުން އޮންނަ ހއ. އަތޮޅަކީވެސް ރިސޯޓު މަދު އަތޮޅެކެވެ.
މި ދަތުރުފުޅުގައި މިނިސްޓަރު އަލީ ހއ. ދިއްދޫ އަދި އެ އަތޮޅު ކެލާއަށް ވަޑައިގަތުމަށް ވަނީ ހަމަޖެހިފައެވެ. މިނިސްޓަރުގެ ދަތުރުފުޅު ނިންމާލައި، އެނބުރި މާލެ ވަޑައިގަންނަވާނީ މާދަމާއެވެ.