ފަނޑިޔާރުން އައްޔަންކޮށްފައިވާ ކޯޓު ނޫން އެހެން ކޯޓަކަށް އެ ފަނޑިޔާރުގެ ރުހުން ނެތި ބަދަލު ކުރުމަކީ ފަނޑިޔާރުގެ މުސްތަގިއްލުކަމާ ހިލާފު ޣައިރު ދުސްތޫރީ އަމަލެއް ކަމަށް ގާނޫނީ ވަކީލު އަދި މަރުތައް ބަލާ ކޮމިޝަނުގެ ރައީސް ހުސްނުއްސުއޫދު ވިދާޅުވެއްޖެ އެވެ.
ވެރިކަން ބަދަލުވެ ޖުޑިޝަލް ސާވިސް ކޮމިޝަން (ޖޭއެސްސީ) އަށް ބަދަލުތަކެއް އައި ފަހުން އިއްޔެ ވަނީ ބައެއް ކޯޓުތަކުގެ ފަނޑިޔާރުން އެހެން ކޯޓުތަކަށް ބަދަލު ކުރުމަށް އެ ކޮމިޝަނުން ނިންމާފަ އެވެ. މީގެ ކުރިންވެސް ފަނޑިޔާރުން އައްޔަން ކުރާ ކޯޓުން އަނެއް ކޯޓަށް ބަދަލު ކުރުމަކީ ޖޭއެސްސީއިން އާންމުކޮށް ކުރާ ކަމެކެވެ.
ސުއޫދު ރޭ ކުރެއްވި ޓްވީޓެއްގައި ވިދާޅުވީ ތަތުބީދީ ފިޔަވަޅުގެ ގޮތުގައި ނޫން ގޮތަކަށް އެ ފަނޑިޔާރެއްގެ ރުހުން ނެތި އެ ފަނޑިޔާރަކު އެއް ކޯޓުން އަނެއް ކޯޓަށް ބަދަލު ކުރުމަކީ ފަނޑިޔާރުންގެ މުސްތަގިއްލު ކަމާއި ހިލާފު ޣައިރު ދުސްތޫރީ އަމަލެއް ކަމަށެވެ.
The Supreme Court proposing the transfer of judges from one court to another is not only judicial overreach gravely undermining @judiciarymv judicial independence, it also emphasises the failure of @MaldivesJSC in its role as the constitutionally-mandated judicial oversight body. https://t.co/NbfKxZ08n1
— Maumoon Hameed (@maanhameed) February 6, 2019
ގާނޫނީ ވަކީލު މައުމޫނު ހަމީދު ވިދާޅުވާ ގޮތުން ސުޕްރީމް ކޯޓުގެ ހުށަހެޅުމަކަށް ފަނޑިޔާރުން އެއް ކޯޓުން އަނެއް ކޯޓަށް ބަދަލުކުރަން ޖޭއެސްސީ ނިންމުމުން އެ މުއައްސަސާއަށް ހަވާލު ކޮށްފައިވާ ގާނޫނީ ޒިންމާ އަދާކުރުމުން ފެއިލްވެފައިވާކަން ހާމަވާ ކަމަށެވެ.
އިއްޔެ ޖޭއެސްސީން ނިންމީ ކްރިމިނަލް ކޯޓުގެ ގާޒީ އާދަމް އާރިފް ޑްރަގް ކޯޓަށް ބަދަލުކުރުމާއި ސިވިލް ކޯޓުގެ ދެ ގާޒީ އަކު ކްރިމިނަލް ކޯޓަށް ބަދަލު ކުރުމަށެވެ.