މި އަހަރަށް ރައްޔިތުންގެ މަޖިލިސް ރަސްމީކޮށް ހުޅުވާ، ދުވަހަކީ ބަންދު ދުވަހެއް ކަމަށް ރައީސް އިބްރާހިމް މުހައްމަދު ސޯލިހް މިއަދު ކަނޑައަޅުއްވައިފި އެވެ.
މަޖިލިސް މި އަހަރަށް ހުޅުއްވަނީ ހަތެއް ފެބްރުއަރީގަ އެވެ.
ރައީސް ސޯލިހުގެ ތަރުޖަމާނު އިބްރާހިމް ހޫދު މިއަދު ކުރެއްވި ޓުވީޓެއްގައި ވިދާޅުވީ، މަޖިލިސް ހުޅުވާ ދުވަސް ރައީސް ސޯލިހް ބަންދު ދުވަހެއްގެ ގޮތުގައި ކަނޑައަޅުއްވާފައިވާ ކަމަށެވެ.
President @ibusolih has today declared that the formal opening of Majlis on 7 February 2019 shall be a public holiday.
— Ibrahim Hood (@MvSpokesperson) January 21, 2019
މިއަންނަ މަހު ހަތް ވަނަ ދުވަހު މަޖިލިސް ހުޅުވާ އިރު ރައީސް ސޯލިހްގެ ފުރަތަމަ ރިޔާސީ ބަޔާން އެ ދުވަހު އިއްވާނެ އެވެ.
މިޖިލިސް ޗުއްޓީ އަށް ދިޔައީ ދައުރު ދިގު ދެމުމަށް ފަހު، މިދިޔަ މަހު 15 ވަނަ ދުވަހު އެވެ. ދައުރު ދިގު ކުރި ނަމަވެސް މަޖިލިސް ޗުއްޓީ އަށް ދިޔަ އިރު ސަރުކާރުން ފާސްކުރަން ބޭނުންވި މުހުންމު ބިލްތަކެއް ވަނީ ފާސް ނުވެފަ އެވެ.
ސަރުކާރު ކޯލިޝަން އިން ވަނީ މަޖިލިސް ޗުއްޓީގައި ދައުރުން ބޭރުން ޖަލްސާއެއް ބޭއްވުމަށް މަޝްވާރާކޮށްފަ އެވެ. ނަމަވެސް އެކަމަށް އަމަލީ ސިފައެއް އައިސްފައެއް ނުވެ އެވެ.
މަޖިލިސް މި އަހަރަށް ފަށާ ރަސްމީ ތާރީހަކީ މިހާރު އޮތް ކޯލިޝަންގެ މައި ޕާޓީ އެމްޑީޕީގެ 2008 ވަނަ އަހަރު އުފެެދުނު ސަރުކާރު ނިމުމަކަށް އައި ދުވަހެވެ.